David Luiz skipti úr Chelsea yfir til Arsenal síðasta sumar og sagðist hafa skipt yfir til að vinna titla. Luiz og félagar fóru vel af stað á upphafi tímabils og um miðjan október sagði varnarmaðurinn að Arsenal gæti barist um titilinn.

Nú eru sjö vikur liðnar frá þessum ummælum hans og er Arsenal ekki búið að vinna einn einasta úrvalsdeildarleik. Liðið er búið að tapa fyrir Sheffield United, Leicester og Brighton og gera jafntefli við Norwich, Southampton, Wolves og Crystal Palace.

Arsenal situr í tíunda sæti deildarinnar með 19 stig eftir 15 umferðir, fimm stigum fyrir ofan Everton sem er í fallsæti.

Næsti leikur liðsins er grannaslagur á útivelli gegn West Ham, sem lagði Chelsea á Stamford Bridge um síðustu helgi. Ljóst er að sá leikur mun ekki hafa áhrif á titilbaráttuna.

Arsenal hefur ekki tekist að vinna einn af síðustu níu leikjum sínum í öllum keppnum. Það er versta gengi félagsins síðan liðið fór í gegnum tíu leiki án sigurs í byrjun árs 1977.

Tweet

Senda a Facebook Hafdu samband Senda frétt Prenta frétt Frétta leit