Koleosho lengi frá - Andlegt ástand Foster orðið betra

„Luca verður frá í nokkurn tíma og þetta eru slæmar fréttir fyrir okkur. Hann lenti í samstuði og meiddist á hné. Ég vona að hann spili aftur áður en tímabilinu lýkur,“ segir Vincent Kompany, stjóri Burnley.

„Þetta er högg fyrir ungan leikmann en ef hann heldur rétt á spilunum getur hann komið betri og sterkari til baka. Ég er ekki í vafa um að hann muni gera það."

Á fréttamannafundi í dag var Kompany einnig spurður út í framherjann Lyle Foster sem hefur verið í leyfi vegna andlegra vandamála. Hann er að glíma við þunglyndi.

„Hann er að taka framfarir og það er vel hugsað um hann. Hann er á betri stað núna en fyrir fjórum vikum. Ég vona að það sé ekki langt í að hann geti hjálpað okkur aftur," segir Kompany.

Burnley er í næstneðsta sæti ensku úrvalsdeildarinnar með aðeins sjö stig en liðið á erfiðan leik gegn Brighton um helgina.