Chelsea mætti Everton í fyrri leik dagsins í ensku úrvalsdeildinni. Skemmst er frá því að segja að um einstefnu var að ræða í dag.

Jordan Pickford var búinn að verja glæsilega áður en Mason Mount kom Chelsea yfir eftir frábæra sókn og huggulegan snúning. Mount tók við boltanum inn í teig, sneri sér og þrumaði á nærstöngina, glæsilegt mark.

Pedro bætti við öðru marki Chelsea á 21. mínútu en Dominic Calvert-Lewin fékk svo dauðafæri fyrir Everton en tókst ekki að skora. Staðan 2-0 í hálfleik. Willian og Olivier Giroud gerðu svo út um leikinn með sitthvoru markinu snemma í seinni hálfleik. Chelsea var allan tíman með völdin í þessum leik og átti mun fleiri marktilraunir en gestirnir.

Slíkir voru yfirburðirnir að Frank Lampard gat leyft sér að ljúka leik með þrjá átján ára leikmenn inn á vellinum. Billy Gilmour var í byrjunarliðinu og lék allan leikinn. Armando Broja og Faustino Anjorin komu inn á sem varamenn í seinni halfleik.

Chelsea styrkir með þessum sigri stöðu sína í deildinni en liðið er í 4. sætinu, tveimur stigum frá Leicester í því þriðja og fimm stigum fyrir ofan Wolves í því fimmta. Manchester United getur þó minnkað forskot Chelsea niður í þrjú stig sigri liðið Manchester City í leik sem hefst klukkan 16:30.