Í viðtölum við bæði BBC og Sky Sports sagði Pep Guardiola, stjóri Manchester City, að sitt lið hefði spilað vel í 2-0 tapinu gegn Manchester United.
„Við spiluðum góðan leik, það vantaði aðeins upp á þegar á síðasta þriðjunginn var komið. Við vorum mikið betri í síðari hálfleik og þetta var góð frammistaða," sagði Guardiola við BBC.
„Þeir biðu og spiluðu löngum boltum fram á Daniel James og Anthony Martial. Við spiluðum okkar leik, en því miður fengum við á okkur mark. Þeir biðu eftir okkar mistökum."
Í viðtali við Sky sagði spænski knattspyrnustjórinn: „Við spiluðum vel. Við hefðum átt að forðast að fá á okkur mark, en við spiluðum líka vel í síðari hálfleik. Hamingjuóskir til Manchester United."
Ederson, markvörður Man City, gerði mistök í báðum mörkum. „Hann varði líka einu sinni eða tvisvar. Hann er stórkostlegur markvörður, mistök eru hluti af leiknum."
Man City var mikið meira með boltann í leiknum, en Man Utd átti 12 marktilraunir gegn sjö tilraunum City.
City er í öðru sæti deildarinnar, en Liverpool er tveimur sigrum frá því að vinna titilinn.
Sjá einnig:
Pep aldrei tapað fleiri deildarleikjum á einu tímabili
Athugasemdir