„Þeir fengu ekki færi, ekkert sem ég man eftir, ég man að Hannes varði eitt skot í byrjun leiks. Mér fannst við vera með mikil tök á leiknum," sagði Aron Einar Gunnarsson, landsliðsfyrirliði, eftir 1-0 sigur á Albaníu í undankeppni EM í dag.
Lestu um leikinn: Ísland 1 - 0 Albanía
„Þetta er okkar leikur. Við fórum aftur í grunnatriðin. Það var það sem skóp þennan sigur. Það sem skipti máli í dag var að ná í þrjú stig."
„Það var pressa á okkur í dag, frá okkur sjálfum, frá ykkur og frá öllum á landinu að ná í úrslit. Búnir og ekki búnir, við erum í þessu til að vinna og við ætlum okkur á EM. Svo einfalt er það."
Ísland er með sex stig eftir þrjá leiki. Framundan er leikur við Tyrkland á heimavelli.
„Frakkar eru sterkasta liðið í þessum riðli og við erum búnir með útileikinn gegn þeim. Við erum komnir með sex stig. Við vissum að þetta yrði erfiður leikur og það verður annar pressuleikur á þriðjudaginn gegn Tyrkjum. Við höfum haft góð tök á þeim og verðum að halda því áfram."
Aron vonast til þess að Laugardalsvöllur verði þéttsetinn á þriðjudaginn.
„Árangur skapar áhorf og fólk vonandi mætir á þriðjudaginn og styður við bakið á okkur. Við þurfum á því að halda."
Viðtalið er hér að ofan.
Athugasemdir