Ljubisa Tumbakovic hefur verið rekinn úr stöðu sinni sem þjálfari Svartfjallalands fyrir að mæta ekki á leik liðsins gegn Kosóvó í undankeppni EM.
Tumbakovic hafi verið smeykur við að mæta á leikinn vegna fyrirmæla frá serbnesku ríkisstjórninni, sem viðurkennir ekki Kosóvó sem sjálfstæða þjóð.
Filip Stojkovic og Mirko Ivanic, sem eru fæddir í Serbíu en leika fyrir Svartfjallaland, tóku heldur ekki þátt í verkefninu. Þess ber að geta að leikurinn fór fram í Svartfjallalandi.
„Framkvæmdaráð var samróma í ákvörðun sinni um að láta Tumbakovic fara eftir að hann ákvað að stýra ekki landsliðinu gegn Kosóvó," segir í yfirlýsingu frá knattspyrnusambandi Svartfellinga.
„Þessi ákvörðun hans kom okkur á óvart og brýtur á samningi hans við landsliðið."
Knattspyrnusambandið tjáði sig einnig um leikmennina tvo sem gáfu ekki kost á sér í leikinn gegn Kosóvó.
„Hlutir sem hafa ekkert skylt við íþróttir unnu í þetta skiptið. Fótboltinn tapaði."
Svartfjallaland gerði 1-1 jafntefli við Kosóvó og er með tvö stig eftir þrjár fyrstu umferðir riðlakeppninnar.
Næsti leikur liðsins er á útivelli gegn Tékklandi á mánudaginn.
Athugasemdir