„Það eru skiptar skoðanir meðal fótboltaunnenda en mér lýst vel á þetta. Ég er rosalega ánægður með hversu mikið þessu var klúðrað á HM kvenna og Copa America í sumar því menn hljóta að segja: Svona gerum við þetta ekki!" segir Sigursteinn.

„Í mínum huga er VAR komið til að vera. Þetta snýst bara um að gera þetta almennilega. Þetta á ekki að taka langan tíma. Við eigum að læra af því sem gerðist í sumar."

Englendingar segjast ætla að nota VAR aðeins í tilfellum þar sem það sést 100% augljóslega að um mistök hafi verið að ræða. VAR er hægt að nota þegar um mistök er að ræða varðandi mörk, vítaspyrnur, bein rauð spjöld eða þegar dómari ruglast á leikmönnum. Það er aðaldómarinn sem mun alltaf taka endanlega ákvörðun.

„Neil Swarbrick var að kynna þetta á Sky og hann talaði að þetta yrði aðeins notað í atvikum sem væru alveg skýr og ætla ekki að teygja sig eins langt hvað varðar rangstöður eins og við höfum verið að sjá. Það á að búa til ákveðna línu," segir Magnús Þór.

„Það er lykilatriði að það sé traust milli þess sem er í VAR herberginu og dómarans, að ekki sé verið að eyða of miklum tíma í að stöðva leikinn og fara að horfa á einhvern skjá. Á HM kvenna var ljóst að dómararnir höfðu ekki nægilega mikið sjálfstraust til að taka stóru ákvarðanirnar."

Hlustaðu á upphitunarþáttinn í hlaðvarpsveitum, hér að neðan eða með því að smella hérna.