„Flóðgáttir opnast, ég veit ekki hversu mörg mörk þeir hefðu getað skorað," sagði Ari Freyr Skúlason þegar hann ræddi við blaðamenn eftir hræðilegt 6-0 tap Íslands gegn Sviss í Þjóðadeildinni í St. Gallen í Sviss í kvöld.
Lestu um leikinn: Sviss 6 - 0 Ísland
„Þetta er stærsta tap sem ég hef upplifað í langan tíma. Að byrja með nýjum þjálfara og að byrja þetta svona er skelfilegt."
„Þeir áttu eina sendingu og þá vorum við allir opnaðir, svo keyrðu þeir á okkur - þeir eru með tekníska og fljóta menn, við vissum það alveg. Við ræddum um Xhaka í hálfleik, hann var í fyrri hálfleik að stjórna öllu. Í seinni hálfleik, ég veit ekki hvernig ég get lýst þessu."
Eftir þriðja markið fór allt loft úr liðinu. Í staðinn fyrir að gera eitthvað þá gafst liðið bara algjörlega upp.
„Það var ekki bara þriðja markið, við sköpuðum ekki neitt, við vorum ekki líkir okkur sjálfum. Það er erfitt að sjá hvað fór úrskeiðis, þetta var alltof auðvelt."
Næsti leikur er gegn Belgíu, sem er ef eitthvað er sterkari andstæðingur.
„Við þurfum að fara aftur í grundvallaratriðin, byggja á þéttleikanum á okkar. Í dag var eins og við værum að gefa þeim færi. Það eru þrír dagar í næsta leik, við verðum klárir á morgun."
Viðtalið er í heild sinni hér að ofan.
Athugasemdir