Rúrik Gíslason var í byrjunarliði Íslands sem mætti Sviss í Þjóðardeildinni í kvöld. Rúrik var skipt út af á 74. mínútu leiksins en inn á í hans stað kom Rúnar Már Sigurjónsson. Leiknum lauk með 6-0 sigri Sviss. Algjörlega hræðileg úrslit.
Lestu um leikinn: Sviss 6 - 0 Ísland
„Tilfinningin er ekki góð. Þetta var mjög erfitt í dag, það verður að segjast alveg eins og er. Við vorum bara skítlélegir í dag. Við þurfum að gíra okkur vel upp í næsta leik," sagði Rúrik eftir leik.
„Það voru auðvitað nýir hlutir sem við vorum að prófa, ekki það að það sé einhver afsökun en við vorum stirðir og eftir á. Maður verður bara að passa sig að láta ekki of stór orð falla."
„Við þurfum að fara yfir þetta og líta í eigin barm, sjá hvað maður hefði sjálfur geta gert betur."
Að sögn Rúriks er þetta versti landsleikur sem hann hefur tekið þátt í á ferlinum.
„Úrslitalega séð þá er það ljóst. Stærsta tap sem ég hef tekið þátt í, maður verður að hafa breitt bak til að þola þetta. Nú verðum við að sýna að við erum karakterar og getum rifið okkur upp fyrir næsta leik."
Athugasemdir
