Þýskaland: Hafa klikkað á síðustu fimm vítaspyrnum

Union Berlin fékk Freiburg í heimsókn í þýsku deildinni í kvöld en liðin hafa byggt á sterkum varnarleik. Liðin eru í 3. og 4. sæti yfir fæst mörk fengin á sig í deildinni á þessu tímabili.

Eftir tuttugu mínútna leik fékk Freiburg vítaspyrnu. Vincenzo Grifo steig á punktinn en Frederik Rönnow í marki Union varði spyrnuna. Þetta var fimmta vítaspyrnan í röð sem leikmanni Freiburg mistekst að skora úr.

Union er ósigrað á heimavelli og byrjaði leikinn betur en Freiburg komst inn í leikinn þegar leið á fyrri hálfleikinn en markalaust var enn þegar flautað var til loka hálfleiksins.

Seinni hálfleikurinn byrjaði á svipuðum nótum og sá fyrri en inn vildi boltinn ekki og markalaust jafntefli niðurstaðan.