Aðeins einn leikur fór fram í ensku úrvalsdeildinni í dag. Leik Manchester City og West Ham sem átti að fara fram seinna í dag var frestað vegna óveðurs.

Á Brammal Lane tóku heimamenn í Sheffield United á móti Bournemouth. Sheffield kom inn í leikinn eftir sigur á Palace í síðustu umferð og Bournemouth hafði unnið tvo deildarleiki í röð. Fyrsta markið skoraði Callum Wilson á 13. mínútu en hann fylgdi á eftir skoti Harry Wilson. Loksins mark hjá Callum Wilson á útivelli en hann hafði ekki skorað á útivelli síðan gegn Leicester í ágúst.

Billy Sharp jafnaði leikinn fyrir heimamenn á annarri mínútu uppbótartíma fyrri hálfleiks. John Egan átti þá skot sem komist var fyrir en Billy Sharp var fyrstur að átta sig og þrumaði boltanum upp í þaknetið. Annað mark Sharp á leiktíðinni en það fyrra kom gegn Bournemouth í opnunarleik tímabilsins hjá þessum liðum.

Ryan Fraser og Lys Mousset komust næst því að skora áður en John Lundstram skoraði sigurmarkið fyrir heimamenn. Lundstram kom inn á sem varamaður á 61. mínútu og skoraði eftir laglegan undirbúning Lys Mousset á 84. mínútu.

Lundstram hefur verið í lykilhlutverki hjá Sheffield á leiktíðinni en eftir komu Sander Berge til félagsins hefur hlutverk hans minnkað. Þetta var fjórða mark Lundstram á leiktíðinni. Mörkin urðu eki fleiri í leiknum. Sheffield er með sigrinum í 5. sæti deildarinnar en Bournemouth er í 16. sæti, tveimur stigum frá fallsæti.