Annar leikur dagins í spænsku La Liga lauk rétt í þessu. Fyrr í dag lagði Espanyol lið Mallorca. Fyrri hálfleikur var tíðindalítill og markalaus. Fyrsta mark leiksins kom á 65. mínútu, Cristian Portu, leikmaður Sociedad, skoraði þá eftir lagleg tilþrif Aleksander Isak í teignum. Isak lék á Dani Garcia og kom boltanum út í teignn á Portu sem skoraði með góðu skoti, virkilega vel gert hjá Isak.

Inaki Williams jafnaði leikinn fyrir gestina á 71. mínútu. Varamaðurinn Iker Muniain vann boltann á eigin vallarhelmingi og lagði hann í gegn á Williams eftir smá sprett. Williams jafnaði með góðu skoti á nærstöngina úr þröngu færi.

Sigurmark leiksins kom svo á 83. mínútu Portu lagði boltann laglega út á Isak í teignum með því að draga boltann út. Skottilraun Isak var varinn en hann fylgdi á eftir og kom boltanum í netið.

Á 89. mínútu fékk Muniain að líta beint rautt spjald fyrir ljóta tæklingu. Mikel Oyarzabal var búinn að losa sig við boltann þegar Muniain kom á strauinu og fór beint í fyrirliðann. Fleira gerðist ekki í leiknum og Sociedad er því komið sex stigum á undan Athletic, Sociedad situr í 6. sæti deildarinnar með 37 stig.