Ítalía: Dybala hetja Roma gegn Venezia

Roma hefur ekki tapað í síðustu átta deildarleikjum eftir nauman sigur á Íslendingaliði Venezia í dag.

Venezia vildi fá vítaspyrnu snemma leiks þegar John Yeboah virtist skjóta boltanum í höndina á Gianluca Mancini en dómarinn dæmdi ekkert. Þá var atvikið skoðað lengi í VAR en það var sama niðurstaða, ekkert víti dæmt.

Mancini var líka í baráttunni hinu megin á vellinum því hann átti skalla að marki eftir aukaspyrnu frá Paulo Dybala en miðjumaðurinn Hans Nicolussi gerði sér lítið fyrir og bjargaði á línu.

Angelino fékk vítaspyrnu eftir tíu mínútna leik í seinni hálfleik. Dybala steig á punktinn og skoraði og tryggði Roma stigin þrjú.

Mikael Egill Ellertsson var í byrjunarliði Venezia en Bjarki Steinn Bjarkason kom inn á fyrir hann á 71. mínútu.