Barcelona er meistari í spænsku Primera Division, efstu deild kvennamegin. Þetta var ákveðið í gær þegar ákveðið var að ljúka keppni í deildinni þetta tímabilið.
Ekkert lið fellur úr efstu deild en Santa Teresa og Eibar komast upp í efstu deild sem efstu liðin í næstefstu deild.
Níu umferðir voru eftir af deildinni þegar keppni var hætt vegna kórónaveirunnar. Barca var ósigrað á toppnum og með níu stiga forskot á Atletico Madrid, sem hafði unnnið deildina þrjú síðustu tímabil.
Á næsta tímabili verða átján lið í efstu deild í stað sextán. Í gær var einnig ákveðið að bikarkeppnin, Copa de la Reina, verði kláruð á næsta tímabili en komið var fram í undanúrslit.
Athugasemdir