Southgate hefur verið að gera góða hluti við stjórnvölinn hjá Englandi frá því hann tók við í september 2016. Hann hefur breytt leikstíl landsliðsins og kom liðinu alla leið í undanúrslit bæði á HM og í Þjóðadeildinni.

Maurizio Sarri er líklega á förum frá Chelsea þar sem Ítalíumeistarar Juventus hafa áhuga á að ráða hann til starfa. Steve Holland, aðstoðarþjálfari enska landsliðsins, hefur einnig verið orðaður við stöðuna hjá Chelsea.

„Ég hef engan áhuga á neinu öðru starfi. Eina sem ég er að hugsa um er EM á næsta ári, við verðum að halda áfram að bæta liðið til að ná árangri þar," sagði Southgate.

„Það er ótrúlega mikill áhugi á landsliðinu um þessar mundir. Við tókum 20 þúsund stuðningsmenn með okkur til Portúgal sem er magnað."