Víkingar mættu í Egilshöll í kvöld og unnu góðan 2-3 útisigur á Fylki í einum af leikjum sumarsins hingað til. Davíð Örn Atlason leikmaður Víkings var ánægður með að landa sigrinum úr því sem komið var en var ósáttur með seinni hálfleikinn.
Lestu um leikinn: Fylkir 2 - 3 Víkingur R.
„Það er mikill léttir að ná í þessi þrjú stig úr því sem komið var en sem betur fer skorum við þrjú mörk í fyrri hálfleik og það dugði til. Við mættum aggresívir til leiks, það var samt kafli í 2-0 stöðunni sem ég var ekki ánægður með en svo náum við aftur að halda boltanum vel en náum ekkert að halda boltanum í seinni hálfleik. Það er eitthvað sem við verðum að skoða"
Davíð spilaði sem sóknarmaður upp yngri flokkana og sýndi gamla takta þegar hann sólaði þrjá og skoraði stórbrotið mark í leiknum. Hann segist eiga eftir að horfa á þetta oft í sjónvarpinu.
„Það mættti segja það, ég er ekki vanur að skora svo ég mun pottþétt horfa á þetta mark oft en það er bara gott að hjálpa liðinu."
Víkingar eru nú komnir uppfyrir þéttan pakka en það er stutt á milli í þessari deild og Davíð gerir sér grein fyrir að þeir eru langt frá því að vera sloppnir við falldrauginn.
„Þetta var gríðarlega mikilvægur leikur og hver sigur er rosalega dýrmætur í þessari deild. Þó að við séum komnir með þremur stigum meira en þessi pakki með 12 stig þá erum við ekkert hólpnir og verðum að halda áfram á sömu braut."
Athugasemdir