Eden Hazard er fyrirliði belgíska landsliðsins sem spilar gegn Frakklandi í undanúrslitum Heimsmeistarakeppninnar í Rússlandi á þriðjudaginn.
Í aðdraganda leiksins var Hazard spurður út í undrabarnið Kylian Mbappé.
„Mbappé? Ég hef spjallað við hann nokkrum sinnum í gegnum síma," sagði Belginn við BeIn Sport.
„Hann horfði á myndbönd af mér þegar hann var krakki. Nú horfi ég á myndbönd af honum! Ég ber mikla virðingu fyrir því hvað hann hefur afrekað á þessum aldri. Það er ekki algengt í nútíma fótbolta."
Hazard ræddi einnig um liðsfélaga sinn hjá Chelsea, N'Golo Kante.
„Ég spila með N'Golo Kante allt árið. Hann er bestur í heiminum í sinni stöðu," sagði hann.
„Þegar hann er upp á sitt besta er 95% líkur á sigri í þeim leik."
Eins og fyrr segir þá leika Belgía og Frakkland um sæti í úrslitum Heimsmeistaramótsins á þriðjudaginn.
Athugasemdir