Fylkir tapaði 2-3 fyrir Víking í Egilshöllinni í kvöld og eru í fallsæti. Helgi Sigurðsson þjálfari Fylkismanna sagði liðið einfaldlega ekki hafa mætt til leiks þegar flautað var á.
Lestu um leikinn: Fylkir 2 - 3 Víkingur R.
„Við byrjuðum ekki leikinn, við vorum bara slakir í fyrri hálfleik og við vitum af því en sýndum karakter í seinni hálfleik en holan var orðin djúp. Við getum ekki ætlast til að skora þrjú mörk í hverjum hálfleik."
Helgi gerði tvær breytingar í hálfleik og sagði þær klárlega haft jákvæð áhrif og taldi liðið alveg geta jafnað leikinn.
„Það hjálpaði til, við unnum seinni hálfleikinn 2-0 en þegar þú ert kominn 3-0 undir er þetta erfitt en við fengum þó færin til að jafna þennan leik en því miður gekk það ekki."
Helgi Valur Daníelsson fékk tvö gul spjöld og þar með rautt en Helgi kenndi Agli dómara alls ekki um tapið í kvöld.
„Dómarinn gaf honum tvö gul og ekki meira um það að segja, maður getur farið að tala um dómarann en það hefur ekkert uppá sig. Það væri mjög lélegt hjá mér að standa hér og fara að kenna dómaranum um hvernig fór í dag."
Ólafur Ingi Skúlason fær leikheimild með liðinu 15.Júlí og er byrjaður að æfa, Helgi segir að engar frekari styrkingar verði á liðinu.
„Hann er byrjaður að æfa og er frábær fengur fyrir okkur, við erum með fínan hóp, þetta er hópurinn sem við klárum þetta mót með. Það verða engar aðrar styrkingar, þetta er nógu gott lið og þeir klára þetta verkefni."
Athugasemdir