Henry er goðsögn í Frakklandi og varð heimsmeistari með Frökkum árið 1998 ásamt því að vera markahæsti leikmaður í sögu landsliðsins, með 51 mark í 123 leikjum.

Hins vegar verður Henry í erfiðri stöðu á morgun þegar Frakkland og Belgía mætast, þar sem Henry verður að öllum líkindum eini Frakkinn í heiminum sem mun vonast eftir því að Frakkland vinni ekki leikinn.

Henry er aðstoðarþjálfari Belgíu en Belgar eru að reyna að komast í úrslitaleik heimsmeistaramótsins í fyrsta skiptið í sögunni.

„Ég var heppinn að hafa spilað með Henry í tvö ár með Frakklandi. Hann var frábær leikmaður," sagði Lloris.

„Það verður skrýtið að sjá hann með belgíska liðinu en þetta er ferillinn hans. Ég held að hjarta hans verði klofið á morgun því þrátt fyrir allt er hann Frakki. Við þekkjum hann, hann elskar fótbolta og verður með Belgíu og mun gefa sig allan í að hjálpa liði sínu."