„Það eru tveir skemmtilegir heimaleikir í viðbót, ég er að reyna að ná upp í 11, við vorum of mikið í Egilshöllinni svo tímabilið náði ekki þangað," sagði Aron Snær Friðriksson markvörður U21 árs landsliðsins við Fótbolta.net á æfingu liðsins í kvöld.
Aron Snær er markvörður Fylkis en komandi leikir U21 árs landsliðsins gegn Norður Írlandi og Spáni fara báðir fram á heimavelli hans, Fylkisvelli í Árbænum. Fyrst á fimmtudag og svo á þriðjudag, báðir hefjast 16:45.
„Þetta er spennandi, það er fullt af yngri leikmönnum hérna sem hafa ekki verið hér áður og verður áhugavert að æfa með og sjá hvað þeir geta. Það er líka fínt að reyna sig við bestu þjóðir í heimi, Spán og Norður Írland sem er aðeins fyrir neðan en ekki mikið verra lið," sagði Aron.
Athygli vakti þegar leikmannahópur íslenska liðsins var tilkynntur að allir markverðir liðsins heita Aron. Viðmælandi okkar, Aron Snær úr Fylki, og norðanmennirnir Aron Birkir Stefánsson úr Þór og Aron Elí Gíslason, KA.
„Ég setti þá reglu strax að þeir yngri þyrftu að heita millinafninu og ég myndi halda Aron. Það hefur enginn mótmælt því hingað til."
Athugasemdir