Birkir Már Sævarsson leikmaður Íslandsmeistara Vals er mættur til Frakklands í landsliðsverkefni. Íslenska liðið mætir því franska í æfingaleik á fimmtudagskvöldið.
„Menn eru alveg ákveðnir í því að sýna að þetta hafi bara verið vinnuslys í leiknum á móti sérstaklega Sviss, og í leiknum gegn Belgíu að einhverju leyti. Menn eru staðráðnir í að koma sterkir til baka."
„Fólk býst ekki við miklu af okkur í leiknum gegn Frakklandi og það er bara gott fyrir okkur, við náum vonandi að koma aftan að þeim. Þeir voru frábærir á HM og eru með mjög gott lið, við þurfum að vera á algjörum toppdegi ef við ætlum að ná í úrslit."
Birkir talar um að það hafi verið sérstakt að koma niðurdreginn úr landsleikjahléi í síðasta mánuði en það hefur svo sannarlega ekki verið venjan uppá síðkastið.
„Sem betur fer fékk ég smá velgengni heima. Það var frábært að lyfta Íslandsmeistaratitlinum, gerist ekki betra."
Birkir hefur æft einn síðan að tímabilið á Íslandi kláraðist.
„Það er auðvitað bara vika liðin en ég er búin að halda mér gangandi síðan þá. Það er kannski frekar næsti mánuður sem verður aðeins leiðinlegri í einstaklingsæfingum. "
Viðtalið við Birki má sjá í heild sinni hér að ofan.
Athugasemdir