Ísland heimsækir Belgíu í Þjóðadeildinni næsta fimmtudag en Belgar eru á toppi heimslista FIFA og unnu fyrri leikinn á Íslandi nokkuð auðveldlega, 0-3.

„Þetta er verðugt verkefni, á útivelli gegn besta liði heims. Við höldum áfram að þróa okkar leik, það er okkar verkefni," sagði Freyr í samtali við Fótbolta.net.

„Við þurfum að vita styrkleikana þeirra og reyna að finna veikleika og svo setjum við leikinn upp með það til hliðsjónar. Það er mjög mikilvægt að horfa í það sem við erum að gera og hafa þróun í því.

„Það er mjög erfitt að horfa í einhverja veikleika og þeir eru með það framyfir aðrar þjóðir að þeir skora úr öllum áttum. Við þurfum að vera mjög klókir í því hvernig við nálgumst þá."

Strákarnir okkar eiga svo heimaleik við Katar mánudaginn 19. nóvember og segir Freyr þann leik vera kærkominn eftir mjög erfitt ár fyrir landsliðið.

„Þeir eru búnir að spila tíu leiki síðan við spiluðum við þá síðast og eru búnir að spila á mörgum leikmönnum. Það er oft óþægilegt að vita ekki hvaða andstæðingur er að koma inn á völlinn en það sem skiptir okkur máli er að við vitum hvernig fótbolta þeir vilja spila.

„Í þessum leik verður langmest áhersla á að prófa okkar leik útfrá veikari andstæðingum heldur en við höfum verið að spila við síðasta árið. Það er kærkomið að fá þannig leik því svoleiðis leikir munu koma upp í undankeppninni sem hefst í mars."