Atlanta varð í gær bandarískur meistari eftir 2-0 sigur á Portland Timbers í úrslitaleik MLS-deildarinnar.
Þetta er einungis annað tímabil Atlanta í MLS-deildinni sem gerir afrekið enn merkilegra. Borgin Atlanta hefur ekki verið þekkt fyrir stór íþróttaafrek í gegnum tíðina.
Josef Martinez kom Atlanta yfir fimm mínútum fyrir leikhlé, hans 35. mark á leiktíðinni.
Martinez var aftur á ferðinni í síðari hálfleik þegar að hann átti stoðsendingu á Franco Escobar sem tvöfaldaði forystu Atlanta. Þar við sat og mikill fögnuður á meðal stuðningsmanna Atlanta braust út í leikslok á Mercedez Benz vellinum.
Eftir leikinn var Martinez valinn verðmætasti leikmaður deildarinnar (MVP) en hann átti algjörlega stórkostlegt tímabil með liðinu.
Áhorfendamet var slegið á leiknum í gær en 75.000 manns voru á vellinum, aldrei hafa fleiri séð úrslitaleik MLS-deildarinnar.
Athugasemdir