Heimild: Vísir.is 

Sandra María er 25 ára gömul og uppalin í Þór/KA þar sem hún hefur leikið stærstan hluta ferilsins. Árið 2016 fór hún á láni til Þýskalands, til Bayer Leverkusen og í fyrra gekk hún svo í raðir félagsins.

Samningur hennar á að renna út eftir núverandi tímabil, en hún sér það fyrir sér að vera áfram í Þýskalandi og segir hún viðræður vera hafnar.

„Mér líður eins og ég sé heima hjá mér og gæti séð fyrir mér að framlengja og spila hérna áfram," sagði Sandra, en tók það einnig fram að það væri ekkert staðfest í þeim efnum.

Sandra hefur í heildina spilað 20 leiki í þýsku úrvalsdeildinni síðastliðin tvö tímabil og skorað í þeim leikjum eitt mark. Verið er að vinna í því að koma úrvalsdeild kvenna aftur af stað, en ekki er enn komin dagsetning á það. Úrvalsdeild karla í Þýskalandi á að hefjast næsta laugardag.