Rúnar Páll: Menn verða að mæta tilbúnir í þennan slag
Mynd: Jónína Guðbjörg Guðbjartsdóttir
Mynd: Jónína Guðbjörg Guðbjartsdóttir
„Svekkjandi að tapa þessum leik, við áttum ekki skilið að tapa," sagði Rúnar Páll Sigmundsson þjálfari Fylkis eftir tap liðsins gegn KA í Bestu deildinni í dag.
„Mér fannst KA vera yfir í baráttunni í fyrri hálfleik, sýndu það líka, voru miklu aggressívari. Við vorum eins og litlir strákar gegn fullorðnum karlmönnum," sagði Rúnar.
„En í seinni hálfleik vorum við aggressívir og stjórnum leiknum frá A-Ö, mörg mjög góð færi og dauðafæri. Ánægður með seinni hálfleikinn en grautfúll með tap."
Rúnar hrósaði leikmönnum sínum í hástert fyrir frammistöðuna í seinni hálfleiknum.
„Ef við hefðum spilað allan leikinn eins og seinni þá hefðum við unnið þennan leik. Menn þurfa að átta sig á því að mæta tilbúnir í þennan slag, það er ekkert ókeypis í þessu," sagði Rúnar.
