„Mér fannst Blikarnir betri en við í dag og þær áttu skilið að vinna leikinn. Svo einfalt er það,“ sagði svekktur Pétur Pétursson, þjálfari Vals, eftir eins marks tap gegn Breiðablik í mikilvægum toppslag Pepsi-deildarinnar.
Lestu um leikinn: Breiðablik 1 - 0 Valur
„Þær voru miklu aggressívari og sköpuðu sér fleiri færi. Við byrjuðum leikinn ágætlega og fengum dauðafæri til þess að komast í 1-0 en eftir það fannst mér við ekki vera líkar sjálfum okkur.“
„Mér fannst við hörmulegar í öllum sendingum og ákvörðunartökum, sérstaklega í seinni hálfleik. Ef við höfðum opnanir til að gera eitthvað eða búa eitthvað til kom bara slæm sending. Þær spiluðu á breiki í seinni hálfleik og fengu allt upp í hendurnar í rauninni,“ sagði þjálfarinn sem var hundsvekktur með spilamennsku síns liðs. Hann er þó ekki búinn að leggja árar í bát enda mótið aðeins hálfnað.
„Það er nóg eftir af þessu móti. Við erum að spila við Selfoss næsta leik og vonandi rífum við okkur upp og gerum þetta betur en í kvöld. Svo er náttúrulega bikarleikur á móti Blikunum aftur eftir viku eða eitthvað svoleiðis. Ég vil meina að þetta mót sé ekki búið þó sumir haldi að þetta sé búið.“
Nánar er rætt við Pétur í sjónvarpinu hér að ofan.
Athugasemdir