KA hefur hafið samstarf við Hawks FC, félag frá Gambíu, og hafa tveir leikmenn frá því félagi komið til Akureyrar og eru núna með leikheimild hjá KA-mönnum.
Þetta eru þeir Matarr Badije og Yankuba Colley, en þeir hafa leikið með yngri landsliðum Gambíu.
„Við fórum í heimsókn til Gambíu fyrir einu og hálfu ári síðan og höfum verið að vinna í því síðustu sex mánuðina að fá tvo stráka til að vera hérna hjá okkur í einhverja mánuði, koma til Evrópu og kynnast einhverju öðruvísi," sagði Sævar Pétursson, framkvæmdastjóri KA, í samtali við Morgunblaðið.
Colley er markvörður, en Badije leikur framar á vellinum, nánar tiltekið sem framherji.
Ibra Jagne, sem lék með Þór, KA og Magna frá 2004 til 2011 kom frá sama félagi.
Þeir spiluðu með B-liði annars flokks KA í gær, en þeir eru ekki komnir hingað til að fara beint í meistaraflokkinn að sögn Sævars. Þó sé aldrei hægt að vita hvað gerist.
Nánar má lesa um málið hjá Morgunblaðinu.
KA er í 11. sæti Pepsi Max-deildarinnar þegar 15 leikir eru búnir.
Athugasemdir
