Breiðablik valtaði yfir Dragon 2014 frá Norður-Makedóníu þegar liðin mættust í forkeppni Meistaradeildar Evrópu í Bosníu í dag.

Áslaug Munda Gunnlaugsdóttir setti tóninn á sjöundu mínútu. Fyrir lok fyrri hálfleiks bættu Blikar við þremur mörkum til viðbótar og voru það Hildur Antonsdóttir, Berglind Björg Þorvaldsdóttir og Selma Sól Magnúsdóttir sem skoruðu.

Í seinni hálfleik gengu Blikar svo á lagið og gjörsamlega völtuðu yfir Dragon. Berglind Björg skoraði þrennu í seinni hálfleiknum og gerði þar með fernu. Selma Sól og Hildur voru einnig á skotskónum í seinni hálfleik og gerðu báðar tvennu. Auk þess skoruðu Alexandra Jóhannsdóttir og Karólína Lea Vilhjálmsdóttir.

Lokatölur 11-0 og er Breiðablik í góðum möguleika á því að fara áfram, en eitt lið fer áfram úr riðlinum. Þetta eru frábær úrslit upp á markatölu.

Síðar í dag mæta heimakonur í Saravejo liði Asa Tel-Aviv frá Ísrael. Saravejo er með þrjú stig fyrir leikinn, en Breiðablik vann Asa Tel Aviv.

Það er útlit fyrir úrslitaleik á milli Blika og Saravejo um sæti í 32-liða úrslitum, en það kemur betur í ljós í dag hver staðan verður.

Breiðablik mætir Saravejo á þriðjudag.