Sky Sports segir að Aston Villa sé að íhuga að ráða Rui Faria, fyrrum aðstoðarstjóra Manchester United, sem nýjan knattspyrnustjóra.

Allan sinn feril hefur Faria, sem er 43 ára, verið hundtryggur aðstoðarmaður Jose Mourinho og meðal annars unnið með honum hjá Chelsea og Real Madrid.

Hann yfirgaf Old Trafford í sumar en talaði nýlega um að hann stefndi á að verða knattspyrnustjóri.

Sky segir að John Terry, fyrrum leikmaður Chelsea, gæti orðið aðstoðarmaður Faria. Terry lék með Villa á síðasta tímabili og hjálpaði liðinu að komast í úrslitaleik umspilsins.

Birkir Bjarnason spilar með Aston Villa sem er í stjóraleit eftir að Steve Bruce var rekinn. Liðið er í 15. sæti Championship-deildarinnar.

Thierry Henry, sem er aðstoðarþjálfari belgíska landsliðsins, var sterklega orðaður við stjórastarf Villa en hann er nú orðaður við Mónakó.

Tweet

Senda a Facebook Hafdu samband Senda frétt Prenta frétt Frétta leit