Arsenal féll úr leik í enska FA-bikarnum á sunnudag þegar liðið tapaði gegn Nottingham Forest, sem er í næst efstu deild á Englandi.
Fyrri hálfleikurinn var fremur rólegur og einu færi Arsenal komu fyrir utan teiginn. Forest reyndi að nýta sér skyndisóknirnar en þær runnu út í sandinn og var því markalaust þegar flautað var til loka fyrri hálfleiks.
Það lifnaði aðeins yfir leiknum í byrjun síðari er Bernd Leno þurfti að hafa sig allan í að verja skot frá Philip Zinckernagel. Bæði lið áttu nokkur hálffæri áður en Forest tók forystuna á 83. mínútu. Arsenal tapaði boltanum á miðsvæðinu, boltinn barst út til hægri á Ryan Yates, sem átti fallega fyrirgjöf sem datt beint fyrir Lewis Grabban og var eftirleikurinn auðveldur.
Gestunum tókst ekki að ná í jöfnunarmarkið og var það markið hjá Grabban sem skildi liðin að.
Er þetta aðeins í annað sinn á síðustu 26 leiktíðum þar sem Arsenal fellur út strax í þriðju umferð, en það er umferðin þar sem úrvalsdeildarfélög koma inn. Hitt skiptið var 2017/18 tímabilið. Og þá var andstæðingurinn líka Nottingham Forest. Greinilega ekki gott fyrir Arsenal að mæta Forest á þessu stigi keppninnar.
2 - Arsenal have been eliminated in the third round of the FA Cup for only the second time across the last 26 seasons, with the other instance also coming away to Nottingham Forest (2017-18). Merry. #EmiratesFACup
— OptaJoe (@OptaJoe) January 9, 2022
Athugasemdir