Sóknarmaðurinn Þorleifur Úlfarsson er á leið í MLS-deildina í Norður-Ameríku. Þorleifur skoraði 15 mörk fyrir Duke og var valinn besti sóknarmaður ACC-deildarinnar, sem er sú sterkasta í háskólaboltanum í Bandaríkjunum.
Hann verður í nýliðavalinu í MLS-deildinni sem fer fram í dag. Mun hann líklega fara ofarlega þar.
Sjá einnig:
„Mjög mikill heiður að fá þennan samning"
„Hann hefur staðið sig vel í Duke og vakið athygli," sagði Sæbjörn Þór Steinke í útvarpsþættinum Fótbolta.net og bætti við: „Ég myndi elska það ef við ættum Íslending sem væri að koma við sögu í leikjum í MLS, ungan og efnilegan. Róbert Orri er þarna en hefur ekki komist inn vegna meiðsla."
„Þetta er strákur sem var hjá Breiðabliki og spilaði einn leik með Blikum í Pepsi Max-deildinni á liðnu ári. Hann spilar 2020 með Augnabliki og var lánaður í Víking Ólafsvík, sem við vitum alveg hvernig var síðasta sumar. Það er ansi stórt stökk að vera allt í einu á leið í MLS-deildina," sagði Elvar Geir Magnússon.
„Hann er ekki bara á leið í MLS-deildina, hann er kominn með GA-samning, sem er stórmerkilegt. Generation Adidas er verkefni sem MLS-deildin er búin að vera með... Ef þú ert GA-leikmaður, þá telur þú ekki gegn launaþaki deildarinnar og færð stærri nýliðasamning en aðrir," sagði Tómas Þór Þórðarson.
Þorleifur er svo sannarlega góð fyrirmynd fyrir annað fótboltafólk á Íslandi sem fer til Bandaríkjanna og sækir sér menntun ásamt því að spila fótbolta. Það eru möguleikar í stöðunni.
Þorleifur fór til Bandaríkjanna í nám í gegnum Soccer Education USA. Hægt er að fara á heimasíðu þeirra með því að smella hérna.
Á vefmiðlinum TopDrawerSoccer var því spáð að Þorleifur myndi fara númer 13 í valinu til DC United. Það er félag sem Wayne Rooney spilaði fyrir áður en skórnir fóru upp á hillu hjá þeim ágæta manni.
Athugasemdir