„Það er erfitt að finna orð til að lýsa tilfinningum mínum eftir leikinn," sagði Cesar Azpilicueta, varnarmaður Chelsea, eftir 6-0 tapið gegn Manchester City í gær.
Chelsea hefur átt erfitt uppdráttar að undanförnu en liðið tapaði einnig 4-0 gegn Bournemouth í lok síðasta mánaðar. Tapið var ennþá stærra í gær.
„Þetta var eitt af verstu kvöldum ferilsins. Þetta er mjög pirrandi og ég er mjög svekktur, Þegar þú tapar 6-0 þá þurfa allir að taka því að þeir spiluðu ekki vel. Við gerðum mistök sem má ekki gera í svona stórleik," sagði Azpilicueta.
„Þegar við unnum gegn þeim á Stamford Bridge þá var það því að við spiluðum allir mjög góðan leik. Í þetta skipti var það ekki uppi á teningnum.
„Það eina sem ég get gert er að biðja stuðningsmennina afsökunar því þetta er ekki ásættanlegt. Ég vorkenni þeim."
Athugasemdir
