West Bromwich Albion heimsækir Leeds United í toppbaráttu Championship deildarinnar um næstu mánaðarmót.
Liðin eigast við á Elland Road föstudaginn 1. mars klukkan 19:45. Þetta er gífurlega mikilvægur leikur fyrir West Brom sem ætlar sér beint aftur upp í ensku úrvalsdeildina eftir að hafa fallið í fyrra.
Leikurinn er það mikilvægur að leikmenn West Brom hafa boðist til að greiða fyrir stuðningsmannarútur til og frá Leeds um kvöldið. Leiknum lýkur klukkan 21:45 og því verða stuðningsmenn ekki komnir heim til West Bromwich fyrr en eftir miðnætti enda 200 kílómetrar á milli borganna.
„Það bendir allt til þess að þetta verði stórleikur á Elland Road. Ef við náum að fá fleiri stuðningsmenn á leikinn með þessu framlagi okkar þá er það hið besta mál, við þurfum allan þann stuðning sem okkur býðst," sagði Chris Brunt, fyrirliði West Brom.
West Brom vann Leeds 4-1 á heimavelli í fyrri umferð tímabilsins. Leeds er í öðru sæti sem stendur, með fimm stigum meira en WBA sem á leik til góða.
Athugasemdir