Hinn 56 ára gamli Mourinho stýrði síðast Manchester United, en var rekinn þaðan í desember síðastliðnum.

Hann er einn sigursælasti stjóri sem uppi hefur verið. Áður en hann stýrði United var hann stjóri hjá stórliðum á borð við Inter, Real Madrid og Chelsea. Hann hefur unnið Meistaradeildina tvisvar, með Inter og Porto.

Mourinho stefnir á að snúa aftur í sumar og kveðst hann vera spenntur fyrir þýsku úrvalsdeildinni, deild sem hann hefur aldrei áður unnið í.

„Þýska úrvalsdeildin er spennandi keppni fyrir mig, liðin um miðja deild eru alltaf að bæta sig," sagði Mourinho við þýska tímaritið Bild."

„Fullir leikvangar, gott skipulag, góðar leikaðferðir í mörgum liðum - Bundesligan er mjög spennandi."

Mourinho var þá spurður hvort Bayern München væri möguleiki.

„Auðvitað er Bayern risi, en ég vona svo sannarlega að Niko (Kovac) haldi starfi sínu vegna þess að hann hefur lagt mikið á sig til þess að komast á þennan stað."

Bayern er á toppnum í Þýskalandi, stigi á undan Dortmund þegar sex umferðir eru eftir.

Stigatöfluna í deildinni má sjá hér að neðan.