Hólmar Örn Eyjólfsson leikmaður Vals var ánægður með úrslit kvöldsins eftir að liðið hans sigraði KA 3-1 á Hlíðarenda.
Lestu um leikinn: Valur 3 - 1 KA
„Ég er bara virkilega sáttur með þessi 3 stig, við áttum líka góðan leik seinast á móti Blikum og við vorum ákveðnir í því að láta hann telja og við gerðum það með því að vinna þennan í dag líka."
Hólmar skoraði fyrsta mark leiksins á 4. mínútu en það er ekki á hverjum degi sem þessi hafsent skorar mörk.
„Ég verð nú að skoða þetta eitthvað aftur, ég er ekki alveg viss af hverjum hann fór inn þannig að það kemur í ljós. En við fáum mikið af föstum leikatriðum og við erum að ná að skapa aðeins upp úr þeim þó við getum gert meira af því. Þannig það er bara jákvætt."
Valur byrjaði mótið ekkert sérstaklega vel miðað við væntingarnar sem voru á þeim. Þeit hafa þó komið til baka og eru núna með 11 stig 1 stigi á eftir FH og Víking sem eru með 12 stig en eiga þó eftir að spila í þessari umferð.
„Við viljum alltaf meira og við vorum virkilega svekktir með fyrstu leikina og við vitum að við getum betur. Við vitum líka að viðg getum betur en það sem viðg gerðum í dag þannig við þurfum að skerpa okkur og vera betri."
Viðtalið má sjá í heild sinni í spilaranum hér fyrir ofan.