Ísland vann 3-2 sigur á Írlandi í vináttuleik í dag. Hér að neðan má sjá einkunnagjöf Fótbolta.net eftir leikinn. Leikmenn íslenska liðsins fá einkunnir fyrir frammistöðu sína í leiknum.
Lestu um leikinn: Ísland 3 - 2 Írland
Lestu um leikinn: Ísland 3 - 2 Írland
Sandra Sigurðardóttir - 6
Það var ekki þannig séð mikið að gera hjá henni í leiknum, reyndi ekki svo mikið á hana en gerði mjög vel þegar hún bjargaði sér eftir að hafa kýlt boltann upp í loftið eftir fyrirgjöf.
Elísa Viðarsdóttir - 6
Elísa lenti ekki í miklum vandræðum varnarlega. Fínir sprettir fram á við en fyrra mark Íra kom upp hennar væng.
Glódís Perla Viggósdóttir - 7
Þrátt fyrir að liðið hafi fengið á sig tvö mörk þá var Glódís öflug, bjargaði nokkrum sinnum vel og komst á milli á nauðsynlegum tímapunktum. Frábær stoðsending og alltaf yfirveguð í sínum aðgerðum, nær 7,5 en 6,5.
Ingibjörg Sigurðardóttir - 6
Virkaði ekki alveg 100% en var ekki í miklum sjáanlegum vandræðum.
Áslaug Munda Gunnlaugsdóttir - 6
Fínasta frammistaða, átti spretti en hefur oft búið til meira fram á við. Fín frammistaða varnarlega þannig séð.
Alexandra Jóhannsdóttir - 6
Var í smá brasi með móttökur á köflum og komust Írarnir í boltann og komust í sókn. Var talsvert betri í fyrri hálfleik en dró af henni í seinni og virkaði þreytt undir lokin.
Gunnhildur Yrsa Jónsdóttir - 7
Fyrirliðinn var eins og vél á miðjunni. Spilaði framarlega á miðjunni og leysti það hlutverk vel. Hún sýndi að hún getur spilað þetta framarlega og gerði vel í markinu.
Dagný Brynjarsdóttir - 7
Frábært að fá Dagný aftur inn í liðið, sifellt ógnandi í föstum leikatriðum og sýndi hvaða gæðum hún býr yfir.
Karólína Lea Vilhjálmsdóttir - 6
Var vinnusöm og ákveðin í sínum aðgerðum, átti fína spretti inn á milli en það kom ekkert svakalega mikið úr því sem hún var að gera. Fannst hún virka þreytt í lokin.
Agla María Albertsdóttir - 8
Frábærlega tekið fyrra mark og stoðsending. Sú telur alveg þó mögulega hafi hún verið eilítið tilviljunarkennd. Fastar fyrirgjafir og heilt yfir spræk á kantinum.
Elín Metta Jensen - 6
Elín hefur átt marga betri landsleiki en þennan en var dugleg og baráttuglöð. Það er eins og hún sé ekki alveg búin að finna taktinn í upphafi sumars.
Varamaður sem fær einkunn:
Guðrún Arnardóttir - 6
Kom inn og komst fyrir eitt skot en annars reyndi ekkert þvílíkt á hana.
Aðrar spiluðu ekki nóg til að fá einkunn.
Athugasemdir