Marjani Hing-Glover, sóknarmaður FH í Pepsi-deild kvenna, verður væntanlega ekki meira með í sumar. Talið er að hún hafi fótbrotnað í leik FH og Grindavíkur í gær.
FH vann leikinn 1-0 með marki Úlfu Dís Kreye Úlfarsdóttur á annarri mínútu leiksins.
Á 57. mínútu lá Marjani eftir á vellinum eftir viðskipti við varnarmann Grindavíkur. „Marjani liggur hér óvíg eftir baráttu við varnarmann. Lítur alls ekki vel út, ég heyri öskrin hingað upp," skrifaði Pétur Hrafn Friðriksson í beinni textalýsingu á Fótbolta.net í gærkvöld.
Hringja þurfti á sjúkrabíl og var Marjani, sem skorað hefur fjögur mörk í níu leikjum í Pepsi-deildinni í sumar, borin af velli.
Í viðtali við mbl.is eftir leikinn sagði Guðný Árnadóttir, miðvörður FH, að Marjani væri líklega fótbrotinn. „Ég held að hún sé fótbrotin, ökklinn snérist alveg var mér sagt. Þetta var hræðilegt."
Athugasemdir