Það voru þrír leikir í deildinni í dag og ekkert af þessum sex toppbaráttuliðum vann sinn leik. Fjögur af toppbaráttuliðunum sex voru að spila.

Tvö af þeim mættust í Mosfellsbæ, Afturelding og Vestri. Afturelding byrjaði mjög vel en gengi liðsins hefur dalað mjög. Á meðan hefur Vestri verið að spila feykivel upp á síðkastið.

Leikurinn var í beinni textalýsingu á Fótbolta.net en það voru engin mörk skoruð í leiknum. Niðurstaðan markalaust jafntefli.

Vestri var á toppnum fyrir leikinn en þessi úrslit gáfu Völsungi og Gróttu tækifæri til að hirða toppsætið. Gróttu tókst hins vegar á einhvern ótrúlegan hátt að tapa gegn Leikni Fáskrúðsfirði. Grótta komst 1-0 yfir á 70. mínútu en Leiknir vann leikinn með því að skora tvö mörk í uppbótartímanum.

Hreint út sagt ótrúlegt en á Húsavík var niðurstaðan 1-1 jafntefli á milli Völsungs og Fjarðabyggðar. Fjarðabyggð komst yfir í upphafi seinni hálfleiks en Völsungur jafnaði fljótlega.

Afturelding 0 - 0 Vestri
Lestu nánar um leikinn

Leiknir F. 2 - 1 Grótta
0-1 Óliver Dagur Thorlacius ('70, víti)
1-1 Mykolas Krasnovskis ('90)
2-1 Mykolas Krasnovskis ('94)

Völsungur 1 - 1 Fjarðabyggð
0-1 Páll Hróar Helgason ('55)
1-1 Elvar Baldvinsson ('64)

Hvað þýða þessi úrslit?
Vestri, Völsungur og Kári eru með 28 stig á toppnum. Afturelding og Grótta eru með 27 stig, en svo kemur Fjarðabyggð með 25 stig. Þróttur Vogum er með 22 stig.

Huginn er á botninum með sex stig, Tindastóll er í 11. sæti með 11 stig, Höttur er mð 14 stig og Leiknir F. með 15 stig. Víðir er í áttunda sæti með 16 stig.

Það eru 15 umferðir búnar í deildinni.

Markaskorarar af urslit.net