Framherjinn Kolbeinn Sigþórsson er ekki í leikmannahópi Nantes sem mætir Mónakó í 1. umferð frönsku úrvalsdeildarinnar.
Kolbeinn kom við sögu í tveimur leikjum undir lok síðasta tímabils eftir að hafa spilað lítið sem ekki neitt í tæp tvö ár.
Kolbeinn vonaðist til þess að vera valinn í landsliðshópinn fyrir HM, en hann var ekki valinn í hópinn. Heimir Hallgrímsson, þáverandi landsliðsþjálfari, talaði um það að valið væri „of snemmt" fyrir Kolbein.
Franska úrvalsdeildin byrjar í dag og fær Kolbeinn ekki að spila. Majeed Waris, Kalifa Coulibaly og Emiliano Sala eru valdir fram yfir Kolbein í hóp Miguel Cardoso, sem tók við Nantes af Claudio Ranieri í sumar.
Það er spurning hvort þetta þýði að ekki sé pláss fyrir Kolbein í leikmannahópi Nantes á tímabilinu. Félagaskiptaglugginn lokar í Frakklandi um mánaðarmótin. Gæti Kolbeinn skipt um lið áður en glugginn lokar?
Næsta landsliðsverkefni Íslands, fyrsta verkefni Erik Hamren sem landsliðsþjálfara er í september, þegar Ísland mætir Sviss ytra og Belgíu heima í Þjóðadeildinni. Kolbeinn spilaði síðast landsleik þegar Ísland tapaði fyrir Frakklandi á EM 2016.
📋 Voici le premier groupe convoqué par @CoachMCardoso pour affronter l'@AS_Monaco demain (17h00) à la Beaujoire 👊🏼#FCNASM | #AllezFCNantes pic.twitter.com/7xD3qpfIwR
— FC Nantes (@FCNantes) August 10, 2018
Athugasemdir