Mesut Özil og Sead Kolasinac, leikmann Arsenal, eru ekki í hóp liðsins sem mætir Newcastle United klukkan 15:00 en óttast er um öryggi þeirra.
Kolasinac og Özil lentu í hræðilegri lífsreynslu í lok júlí er tveir menn vopnaðir hnífum reyndu að ræna þá. Leikmennirnir voru ásamt eiginkonum sínum er atvikið átti sér stað en bosníski leikmaðurinn barðist á móti og flúðu árásarmennirnir vettvang.
Leikmennirnir hafa ekki getað tekið þátt í undirbúningi liðsins fyrir tímabilið og verða þá ekki með gegn Newcastle í dag en tveir menn voru handteknir fyrir utan heimili Özil á fimmtudag.
Þeir veittust þá að öryggisvörðum áður en kallað var til lögreglu en mennirnir voru handteknir á staðnum.
Þeir hafa nú þegar verið kærðir og munu þeir fara fyrir rétt í næsta mánuði en lögregla telur að atvikið tengist ekki árásarmönnunum frá því í síðasta mánuði.
Athugasemdir