Íslenska landsliðið skipað leikmönnum 21 árs og yngri tók á móti því norður-írska í undankeppni fyrir EM 2019.

Úr varð ansi bragðdaufur leikur þar sem mikið jafnræði var með liðunum og lítið um færi.

Eina mark leiksins datt þó með gestunum. Daniel Ballard skoraði það með skalla eftir hornspyrnu frá Jamie McDonagh.

Sigurinn er mikilvægur fyrir Norður-Íra sem eru í baráttu við Slóvakíu um 2. sæti riðilsins. Ísland er ekki lengur í þeirri baráttu og situr eftir með 11 stig úr 9 leikjum.

Síðasti leikur Íslands í undankeppninni er gegn toppliði Spánverja næsta þriðjudag. Leikið verður á Fylkisvelli.