„Ég var mikið að fylgjast með leikjum og þekki mjög marga leikmenn vel svo það hefur hjálpað klárlega," sagði Aron Elís en hann endaði 30 stigum á undan næsta liði.

„Auðvitað var maður að fylgjast mikið með stöðu mála í lokin en ég var með þægilega forystu fyrir lokaumferðirnar svo ég gat verið nokkuð rólegur."

Nokkrir leikmenn skiluðu flestum stigum fyrir Aron Elís í leiknum í ár. „Ég held að það hafi verið stórt að ég hélt tryggð við Thomas Mikkelsen, menn voru fljótir að selja hann þegar hann datt á smá þurrkatímabil en ég var sannfærður að hann myndi byrja skora aftur."

„Annars voru Hallgrímur Mar, Hilmar Árni og Óskar Örn leikmenn sem voru alltaf í liðinu og skiluðu helling af stigum."

Hinn 24 ára gamli Aron Elís er á förum frá Álasund eftir tímabilið en hann hefur verið orðaður við félög í Pepsi Max-deildinni. Verður hann einn af leikmönnunum sem verða í boði á Draumaliðsdeildinni á næsta ári? „Ég get bara ekki sagt neitt eins og er. Stefnan er að vera úti áfram og ég mun skoða tilboðin sem koma þaðan fyrst."

Sigurvegarinn í Draumaliðsdeildinni fær fullt af harðfisk frá Eyjabita og einnig ferð á leik í enska boltanum fyrir tvo með VITA ferðum. „Það verður einhver Liverpool leikur, það er klárt!" sagði Aron að lokum.