James Mack og Rick Ten Voorde eru báðir á förum frá bikarmeisturum Víkings en þetta staðfesti Haraldur Haraldsson framkvæmdastjóri félagsins í samtali við Fótbolta.net í dag.
Rick Ten Voorde er hollenskur framherji sem hefur verið hjá Víkingi undanfarin tvö tímabil.
Hinn 28 ára gamli Rick skoraði fimm mörk í 26 leikjum með Víkingi í Pepsi Max-deildinni áður en hann fór í Þór á láni í júlí síðastliðnum. Þar skoraði hann fimm mörk í ellefu leikjum í Inkasso-deildinni.
Mack er kantmaður sem kom til Víkings síðastliðinn vetur eftir að hafa áður leikið með Selfossi og Vestra.
Hinn 31 árs gamli Mack spilaði fimm leiki í Pepsi Max-deildinni með Víkingi í sumar og einn leik í Mjólkurbikarnum.
Mack hefur spilað á Íslandi síðan árið 2016 en hann er fyrirliði í landsliði Jómfrúareyja.
Athugasemdir