Í hádeginu fær Liverpool lið Fulham í heimsókn. Liverpool er enn ósigrað í deildinni en gengið upp á síðkastið hefur ekki verið sérstakt. Liverpool hefur aðeins unnið þrjá af síðustu níu leikjum sínum en liðið tapaði gegn Rauðu stjörnunni í Serbíu, í Meistaradeildinni síðastliðinn þriðjudag.

Fulham hefur ollið vonbrigðum það sem af er þessu tímabili og er á botni deildarinnar fyrir leikinn.

Gylfi Þór Sigurðsson og félagar í Everton heimsækja Chelsea klukkan 14:15. Chelsea er eins og Liverpool ósigrað í deildinni.

Arsenal fær Wolves í heimsókn klukkan 16:30 en á sama tíma hefst leikur Manchester City og Manchester United á Etihad-leikvanginum.

City er búið að vera að spila frábærlega í deildinni og er á toppnum með níu sigra og tvö jafntefli fyrir leikinn í dag. Það hefur ekki gengið eins vel hjá United í deildinni en það er mikill meðbyr með Jose Mourinho og hans lærisveinum þessa daganna.

United vann 3-2 á Etihad-vellinum á síðustu leiktíð í mögnuðum leik. Hvað gerist í dag?

Leikir dagsins:
12:00 Liverpool - Fulham (Stöð 2 Sport)
14:15 Chelsea - Everton (Stöð 2 Sport)
16:30 Arsenal - Wolverhampton Wanderers
16:30 Manchester City - Manchester United (Stöð 2 Sport)