Í þáttunum "Gudjohnsen" sem má finna á Sjónvarpi Símans Premium ræðir Eiður við æskuvin sinn, Sverrir Þór Sverrisson, betur þekktan sem Sveppa, um það hvort hann sé spilafíkill eða ekki.

„Nei," sagði Eiður er Sveppi spurði hann hreint út.

„Sennilega versta ákvörðun sem hefur verið tekin"
En hvernig fór þessi umræða í gang?

Eiður fór í viðtal við tímaritið People sem hann segir að hafi reynst skelfileg ákvörðun. Eiður fór í viðtalið á þeim forsendum að hann myndi vara ungu kynslóðina við veðmálum og annarri "hættu". Viðtalið snerist hins vegar um veðmálavanda Eiðs.

„Gula pressan fann einhverja frétt og bjó til úlfalda úr mýflugu," segir Eiður. „Svo asnaðist ég að fara í viðtal þar sem var búið var að setja það upp að ég væri að vara ungu kynslóðina við að þetta væri hættulegt, ungir atvinnumenn með peninga ættu að vara sig á "hættunum", hvort sem það væru veðmál eða að fara út á lífið."

„Umboðsmaðurinn minn þá ráðlagði mér að fara í þetta viðtal. Þetta er sennilega versta ákvörðun sem hefur verið tekin. Í kjölfarið á því halda allir að ég sé spilafíkill."

Eiður segir það kjaftæði að hann hafi skuldað spilavítum margar milljónir eins og talað var um.

„Það er kjaftæði. Þú færð þér kannski bjór en þú ert ekki alkóhólisti. Ég hef farið í spilavíti en er ekki spilafíkill."

Þá er það komið á hreint.