Jürgen Klopp var besti þjálfari ensku úrvalsdeildarinnar í mars og Sadio Mane besti leikmaðurinn. Liverpool gerði eitt jafntefli og vann þrjá í mars, meðal annars gegn Tottenham, og skoraði Mane þrjú mörk í leiðinni.
Þetta er í þriðja sinn sem Klopp hlýtur nafnbótina og í annað sinn hjá Mane og eru þeir félagarnir þannig búnir að jafna Jose Mourinho og Eden Hazard, sem hafa hlotið viðurkenningarnar jafn oft.
Mane er búinn að vera í stuði á tímabilinu og er kominn með 17 mörk í 31 deildarleik. Liverpool er einnig búið að vera í gífurlegu stuði undir stjórn Klopp og er að berjast við Manchester City um Englandsmeistaratitilinn.
Hazard og Mourinho hafa samanlagt unnið úrvalsdeildina fimm sinnum, þó aðeins einu sinni sem samherjar.
Athugasemdir