„Þú ert aldrei ánægður þegar þú vinnur ekki leiki en þetta hefur verið kafli þar sem við höfum spilað við nokkur verulega góð lið. Við höfum átt góðar frammistöður en höfum ekki haft gæðin og trúna fyrir framan markið," segir Solskjær.

„Við hefðum átt að vinna Wolves og Arsenal miðað við tækifærin sem við fengum. Við höfum verið að æfa. Sem sóknarmaður veit ég hversu miklu máli skiptir að hafa trú. Stundum vantar aðeins upp á sjálfstraustið. Við þurfum að vera öflugri fyrir framan markið."

Staðan á hópnum
United, sem er í harðri baráttu um að enda í topp fjórum, mætir West Ham á morgun. Ander Herrera getur ekki spilað vegna meiðsla. Alexis Sanchez æfði í morgun en Solskjær segir ólíklegt að hann spili leikinn. Ashley Young og Luke Shaw verða í banni.

Sanchez hefur misst af sex leikjum vegna meiðsla en Antonio Valencia er einnig fjarverandi. Solskjær segir mögulegt að Nemanja Matic geti tekið þátt í leiknum.