„Ég er sáttur við jafntefli miðað við hvernig leikurinn var. Þetta var hörkuleikur, jafn leikur og sterkt að koma svona snemma til baka eftir að við fáum mark snemma í andlitið. Svo gerir Beitir vel í að verja vítaspyrnu í upphafi síðari hálfleiks," sagði Rúnar Kristinsson þjálfari KR eftir 1 - 1 jafntefli við Fylki í Pepsi Max-deildinni í kvöld.
Lestu um leikinn: Fylkir 1 - 1 KR
„Mér fannst vítaspyrnudómurinn soft en alveg hægt að dæma. Það skiptir samt engu máli því Beitir varði vel og við vorum líklegri stærstan hluta síðari hálfleiks fannst mér. Spiluðum fínt og færðum boltann en ákvörðunartakan ekki nægilega góð. Svo kom smá pressa frá Fylki í restina. Þetta er hörkugott Fylkislið sem er kraftur í, ungir strákar sem eru mjög sprækir og erfiðir við að eiga. Ég held að þetta hafi verið sanngjarnt jafntefli og við erum sáttir við þetta stig," sagði Rúnar sem hélt svo áfram að hrósa heimamönnum í Fylki.
„Þetta er öðruvísi Fylkislið en við höfum séð áður, þeir spiluðu mikið út frá markmanni og á sama tíma eru þeir með marga menn frammi svo það er erfitt að pressa á þá. Þeir gera þetta vel og taka sénsa en leysa það ofboðslega vel. Þetta er flott taktík hjá þeim og skemmtileg og þeir gera okkur erfitt fyrir oft á tíðum. Heilt yfir eru þetta sanngjörn úrslit."
Nánar er rætt við Rúnar í sjónvarpinu að ofan, hann ræðir Odd Inga sem fer í Grindavík í kvöld, Kjartan Henry Finnbogason, Covid test og meiðsli Kristjáns Flóka.
Athugasemdir