„Það var mjög mikilvægt að taka þrjú stig hérna eftir sigurinn á móti KR," sagði Þorri Mar Þórisson, leikmaður KA, eftir sigur á Leikni á Dalvík.
Lestu um leikinn: KA 3 - 0 Leiknir R.
Þorri hefur verið nokkuð að glíma við meiðsli en hann byrjaði í dag eftir að hafa átt flotta innkomu í sigrinum gegn KR.
„Maður er að detta í gírinn. Það er mjög góð tilfinning að vera kominn aftur. Mér fannst ganga þokkalega vel. Það er erfitt þegar maður er aðeins smeykur að fara í allar sóknir en heilt yfir gekk þetta mjög vel."
KA spilaði á Dalvík í dag, í heimabæ Þorra, og þar líður honum vel. Grasið á Akureyrarvelli er ekki boðlegt.
„Eins og Addi segir, þá myndi ég velja að spila alla leiki hér. Þetta eru topp aðstæður og þegar veðrið er svona þá er ekki hægt kvarta," sagði Þorri sem spilaði í hægri bakverði. Hann segir að það sé sín framtíðarstaða.
„Ég myndi segja að það sé mín framtíðarstaða. Mér líður mjög vel í henni. Ég var bakvörður að upplagi, fór á kantinn en er núna orðinn aftur bakvörður."
Athugasemdir