„Það mikilvægasta er völlurinn og hann er hrikalega góður eins og aðstaðan hérna. Veðrið er gott og hótelið mjög fínt. Á rússneskan standard er það örugglega nía eða tía."

Hvernig er að vakna á hverjum degi og hugsa um að HM sé handan við hornið?

„Maður er að berjast við að vera ekki yfirspenntur. Það er óhjákvæmilegt að spennan stigmagnist með hverjum degi. Maður er ekki kominn í geðveikina en það er eðlilegt að þetta stigmagnist."

Alfreð segir að íslenski hópurinn telji sig hafa fundið einhverja veikleika í hinu gríðarlega sterka argentínska landsliðið.

„Við förum í hvern leik með klárt plan og í þeirra leikstíl eru klárlega ákveðnir hlutir sem við getum nýtt okkur. Svo mun bara koma á daginn hvernig við munum nýta okkur það. Við verðum að þora að taka einhverja sénsa. Varðandi styrkleika þá getum við tekið langan tíma í að fara yfir þá. Þetta er heimsklassa lið," segir Alfreð.

Hann telur að það sé ekki auðveldara fyrir Ísland að taka út argentínska liðið en fyrir Argentínumenn að taka út okkar leikstíl.

„Ég held að við séum lið sem er mjög auðvelt að „skáta" en það er hinsvegar mjög erfitt að spila á móti okkur. Það eru mörg lið þannig. Það kemur í raun ekki mikið á óvart í okkar leik. Það vita allir að við tökum löng innköst en samt skoruðum við úr löngu innkasti gegn Englandi og skoruðum úr horni í síðasta leik. Það er auðvelt að segja að Messi fari alltaf til hægri en þegar á hólminn er komið er erfitt að díla við það."

Alfreð segist búa sig undir leikinn eins og hann muni verða í byrjunarliðinu.

„Þannig undirbý ég mig alltaf. Ég er ekki mikið að hugsa um eitthvað annað. Ég er með góða tilfinningu og það hefur gengið vel í undirbúningnum. Ég er á góðum stað líkamlega og hafði mjög gott af þessum æfingaleikjum," segir Alfreð